މުއާމަލާތުކުރުން: ފިލާވަޅު 3 – މުއާމަލާތުކުރުމުގެ ތިއަރީތަކާއި މޮޑެލްތައް

މުއާމަލާތުކުރުމުގެ ތިއަރީތަކާއި މޮޑެލްތައް ދެނެގަތުމަކީ މައުލޫމާތު ބަދަލުކުރާ ގޮތް ދިރާސާކޮށް ހަރުދަނާކުރުމަށް ކޮންމެހެން އެނގެންޖެހޭ ކަމެކެވެ. މި ފިލާވަޅުގައި ބަލައިލާނީ އެއްކޮޅަށް ހިނގާ އާދައިގެ މުއާމަލާތްތަކުން ފެށިގެން ދެފަރާތުން އެކުއެކީގައި މެސެޖު ބަދަލުކުރާ، އެންމެ ފުޅާ މޮޑެލްތަކަށް މުއާމަލާތުގެ ތިއަރީތައް ބަދަލުވަމުންދާ ގޮތުގެ މައްޗަށެވެ. އަދި މުއާމަލާތަށް ހުރަސްއަޅާ އާންމު ސަބަބުތަކާއި، ތަފާތު ހާލަތްތަކުގައި ކާމިޔާބު މުއާމަލާތެއް ކުރުމަށް ޓަކައި، ފީޑްބެކް ނުވަތަ ރައްދުގެ މުހިންމުކަމުގެ މައްޗަށެވެ.

1 ލީނިއަރ، އިންޓަރެކްޓިވް އަދި ޓްރާންސެކްޝަނަލް މޮޑެލްތައް

އިންސާނުންގެ ގުޅުންތަކުގެ ފުންމިން ދެނެގަނެވުނު ވަރަކަށް، މުއާމަލާތުކުރުމުގެ މޮޑެލްތަކަށް ވެސް ބޮޑެތި ބަދަލުތަކެއް އައިސްފައިވެއެވެ. މި މޮޑެލްތަކުގެ ސަބަބުން ތަފާތު ހާލަތްތަކުގައި މުއާމަލާތްތައް ހިނގާ ގޮތް ދެނެގަތުމަށް ފިކުރީ އޮނިގަނޑެއް އޮތުން މުހިންމުވެއެވެ.

ލީނިއަރ މޮޑެލްތައް  (Linear Models)

އެންމެ ކުރީގެ މޮޑެލްތަކުގައި މުއާމަލާތުކުރުން ސިފަކޮށްފައިވަނީ އެއްކޮޅަށް ހިނގާ މަރުހަލާއެއްގެ ގޮތުގައެވެ. އެއީ މެސެޖު ފޮނުވާ މީހާ، ވަސީލަތެއް މެދުވެރިކޮށް މެސެޖު ލިބޭ މީހާއަށް މެސެޖު ފޮނުވުމެވެ.

• ޝެނަން-ވީވާ މޮޑެލް (1948): ބޮޑަށް އަމާޒުކޮށްފައިވަނީ ޓެކްނިކަލް މުއާމަލާތްތަކަށެވެ. މީގެ ބައިތަކުގެ ތެރޭގައި މައުލޫމާތުގެ މަސްދަރު، ފޮނުވާ ވަސީލަތް، މެސެޖު ދަތުރުކުރާ މަގު، މެސެޖު ބަލައިގަންނަ މީހާ އަދި މަންޒިލް ހިމެނެއެވެ. އަދި މެސެޖު އޮޅުންބޮޅުންކޮށްލާ ކޮންމެ ކަމަކަށް “ނޮއިސް/ހުރަސް” ގެ މަފްހޫމް ފުރަތަމަ ތައާރަފުކުރީ މި މޮޑެލްގައެވެ.
• ލެސްވެލްސް މޮޑެލް (1948): ވާހަކަދެއްކުމުން ބަޔާންކޮށްދިން މޮޑެލްއެކެވެ: “ފޮނުވަނީ ކާކު؟ ބުނަނީ ކީކޭ؟ ކޮން ވަސީލަތަކުން؟ ކާކަށް؟ ކުރަނީ ކޮން އަސަރެއް؟” މިއީ މުއާމަލާތުން އަނެކުން އެއްބަސްކުރުވުމަށް (Persuasion) އިސްކަންދިން މޮޑެލްއެކެވެ.
• މުހިންމު ސިފަތައް: އެއްކޮޅަށް މެސެޖު ދަތުރުކުރުން، މެސެޖު ލިބޭ މީހާ، މެސެޖު ލިބެމުންދާ ވަގުތު އަޑުއަހަން ހުރުން (ފަހަރަކު މީހަކު ވާހަކަދެއްކުން)، ފީޑްބެކް ދެވޭނެ ނިޒާމެއް ނެތުން.

އާންމުގޮތެއްގައި މިބާވަތުގެ މޮޑެލްތައް ބޭނުންކުރެވެނީ ބްރޯޑްކާސްޓްކުރުން ފަދަ އާންމު މީޑިއާ މުއާމަލާތްތަކުގައެވެ.

• ފާހަގަކުރެވުނު އުނިކަންކަން: ފީޑްބެކާއި، މާހައުލާއި، ގިނަ މުއާމަލާތްތަކުގައިވާ ދެފަރާތުގެ ބައިވެރިވުން އުނިކޮށް، އިންސާނީ މުއާމަލާތްތައް ވަރަށް އާދައިގެ ކަމެއްގެ ގޮތުގައި ސިފަކޮށްފައިވުން.

އިންޓަރެކްޓިވް މޮޑެލްތައް  (Interactive Models)

މި މޮޑެލްތަކުގައި ފީޑްބެކް (ރައްދު)ގެ މަފްހޫމް ތައާރަފުކޮށް، މުއާމަލާތަކީ ފޮނުވާ މީހާއާއި ލިބޭ މީހާއާ ދެމެދު ހިނގާ، ދެކޮޅަށް ހިނގާ (Two-way) މަރުހަލާއަކަށް ހެދިއެވެ.

• ޝްރާމްސް މޮޑެލް (1954): މުއާމަލާތުކުރުމަށް ޓަކައި ފޮނުވާ މީހާއާއި ލިބޭ މީހާގެ ދެމެދުގައި “ތަޖުރިބާގެ އެއްގޮތްކަމެއް” (Fields of experience) އޮންނަންޖެހޭނެކަން ފާހަގަކުރިއެވެ. އަދި މެސެޖު އެންކޯޑުކުރުމާއި ޑީކޯޑުކުރުމުގެ މަފްހޫމް ތައާރަފުކުރިއެވެ.
• އޮސްގުޑް-ޝްރާމް މޮޑެލް: މުއާމަލާތަކީ ދައުރުވާ މަރުހަލާއެއްގެ ގޮތުގައި ދެއްކިއެވެ. މީގައި ދެފަރާތުން ވެސް އެކުއެކީގައި މެސެޖު ފޮނުވާ މީހާ އަދި ލިބޭ މީހާގެ ދައުރު އަދާކުރެއެވެ.
• މުހިންމު ސިފަތައް: ދެކޮޅަށް ހިނގާ މުއާމަލާތް، ފީޑްބެކް ހިމެނުން، ހިއްސާކުރެވޭ ތަޖުރިބާތަކަށް ރިއާޔަތްކުރުން؛ އަމިއްލަ ގުޅުންތަކުގެ މުއާމަލާތަށް އިތުރަށް އެކަށީގެންވުން.
• އުނިކަންކަން: އެކުއެކީގައި ހިނގުމުގެ ބަދަލުގައި، އަދިވެސް މުއާމަލާތު ސިފަކޮށްފައިވަނީ އެކަކަށްފަހު އަނެކަކު މެސެޖު ފޮނުވާ ތަރުތީބު މަރުހަލާއެއްގެ ގޮތުގައެވެ.

ޓްރާންސެކްޝަނަލް މޮޑެލްތައް  (Transactional Models)

އެންމެ ޒަމާނީ ވިސްނުމުގައި، މުއާމަލާތުކުރުމަކީ މީހުން އެކުއެކީގައި މެސެޖުތައް ފޮނުވައި އަދި ބަލައިގަންނަ، އެއްވަގުތެއްގައި ހިނގާ މަރުހަލާއެކެވެ.

• ބާންލަންޑްސް ޓްރާންސެކްޝަނަލް މޮޑެލް (1970): މުއާމަލާތަކީ އަބަދުވެސް ބަދަލުވަމުންދާ، ހުއްޓުމެއްނެތި ހިނގާ ކަމެއްކަން ފާހަގަކުރިއެވެ. މުއާމަލާތުގައި ބައިވެރިވާ ދެފަރާތައް ވެސް އެއްވަގުތެއްގައި މެސެޖު ފޮނުވުމާ ލިބިގަތުމުގައި ބައިވެރިވެވެއެވެ.
• މުހިންމު ސިފަތައް: މުއާމަލާތް އެއްވަގުތެއްގައި ހިނގުން، ހާލަތަށް ބިނާވުން (މާއްދީ، އިޖުތިމާއީ، ސަގާފީ މާހައުލު މުހިންމުވުން)، ގުޅުން ބަދަހިވުން، އަދި ކުރެވޭ މުއާމަލާތް އަނބުރާ އިއާދަ ނުކުރެވޭގޮތަށް އޮތުން  (Irreversible)
• ބޭނުންކުރެވޭ ހާލަތް: އެކަކު އަނެކަކަށް ފެނިދެނިވެ މުއާމާލާތުކުރެވޭ ހާލަތްތަކުގައި،ބަހަކާ ނުލައި ކުރެވޭ އިޝާރާތްތަކާއި، ހިއްސާކުރެވޭ އެކިކަހަލަ މާނަ ދޭހަވާ ހަރަކާތްތަކުންނާއި، ޢަމަލުތަކުން، އެ މުއާމަލާތެއް އެންމެ ފުރިހަމައަށް ސިފަކޮށްދިނުމަށް ބޭނުންކުރެވެއެވެ.
• ފައިދާތައް: ހަގީގީ ދުނިޔޭގައި އިންސާނީ މުއާމަލާތްތަކުގެ ފުންމިން އެންމެ ސައްހަކޮށް ދައްކުވައިދޭ މޮޑެލްއެވެ.

2 މުއާމަލާތުކުރުމަށް ހުރަސްއަޅާ ކަންކަމާއި އެ ކަންކަމުން އަރައިގަތުން

މުއާމަލާތުކުރުމަށް ހުރަސްއަޅާ ކަންކަމުގެ ބާވަތްތައް

ހުރަސްތަކަކީ ބޭނުންވާ މެސެޖު އޮޅުންބޮޅުންކޮށްލައި ނުވަތަ މެދުކަނޑާލާ ކަންކަމެވެ. މީގެ ސަބަބުން ނުބައިކޮށް މުއާމަލާތް ކުރެވި، އޮޅުންތައް އުފެދެއެވެ.

• މާއްދީ ހުރަސްތައް (Physical Barriers) މެސެޖު ފޮނުވުމަށް ހުރަސްއަޅާ އަޑުގަދަވުމާއި، ދުރުމިނާއި، އަލި މަޑުވުން ނުވަތަ ޓެކްނިކަލް މައްސަލަތައް ފަދަ މާހައުލުގެ ތެރެއިން ކުރިމަތިވާ ކަންކަން.
• ނަފްސާނީ ހުރަސްތައް (Psychological Barriers) ކުރީގެ ވިސްނުންތަކާއި، ތައައްސުބާއި، އިހުސާސްތަކާއި، ބަންދުވެފައިވާ ވިސްނުމާއި، މައުލޫމާތު ނުކަތާވަރުވުން (Information overload) ފަދަ ސިކުނޑިއާއި އިހުސާސްތަކާ ގުޅޭ ކަންކަން.
• ބަހުގެ ހުރަސްތައް (Semantic Barriers) އުނދަގޫ އޮޅުންބޮޅުން ބޮޑު ލަފުޒުތަކާއި ޖުމުލަތައް (Jargon)، ޓެކްނިކަލް ބަސްތައް، މާނަ ގިނަ ބަސްތައް، ނުވަތަ އެކި މީހުން އެއް ބަހެއް ތަފާތު ގޮތަކަށް މާނަކުރުން ފަދަ ބަހުގެ މައްސަލަތައް.
• ސަގާފީ ހުރަސްތައް (Cultural Barriers) ތަފާތު ސަގާފަތްތަކުގެ މެދުގައިވާ އުސޫލުތަކާއި، އިޖުތިމާއީ ހަމަތަކާއި، ބަހަކާ ނުލައި ކުރެވޭ އުޅުންތަކާއި، މުއާމަލާތުކުރާ ގޮތުގެ ތަފާތުތައް.
• އޮގަނައިޒޭޝަނަލް ހުރަސްތައް (Organizational Barriers) ކަންކަން ހިންގުމުގެ އޮނިގަނޑު އޮންނަ ގޮތުން، އެކަށީގެންނުވާ ވަސީލަތްތައް ބޭނުންކުރުމުން ނުވަތަ މައުލޫމާތު އުނިކޮށްގެން ފޮނުވުމުން އުފެދޭ މައްސަލަތައް.
• ޖިސްމާނީ ހުރަސްތައް (Physiological Barriers) އަޑުއެހުމުގެ ނުކުޅެދުންތެރިކަން، ވާހަކަދެއްކުމުގެ މައްސަލަތައް، ނުވަތަ ހަނދާންބެހެއްޓުމުގެ ކަންކަން ފަދަ އިންސާނާގެ ހަށިގަނޑާ ގުޅޭ ކަންކަން.

ހުރަސްތަކުން އަރައިގަންނާނެ އުސޫލުތައް

ކާމިޔާބުކަމާ އެކު މުއާމަލާތުކުރާ މީހުން، މެސެޖު ބޭނުންވާ ގޮތަށް ދޭހަވާކަން ކަށަވަރުކުރުމަށް ޓަކައި ދިމާވެދާނެ ހުރަސްތައް ކުރީބައިގައި ދެނެގަނެ، އެކަންކަމަށް ހައްލު ހޯދައެވެ.

• ކަނުލައި އަޑުއެހުން (Active Listening) ހަމައެކަނި އަޑުއަހާލުމުގެ ބަދަލުގައި، ދައްކާ ވާހަކައަށް ފުރިހަމައަށް ސަމާލުކަންދީ، ދޭހަކޮށް، ރައްދުދީ، ހަނދާނުގައި ބެހެއްޓުން.
• މުއާމަލާތުގެ ސާފުކަމާއި ސާދާގޮތް: އަޑުއަހާ މީހާއާ ގުޅޭ، ސާފު، އާދައިގެ ބަސްމަގު ބޭނުންކުރުމާއި ބޭކާރު އުނދަގޫ ބަސްތަކުން ދުރުހެލިވުން.
• ގިނަ ވަސީލަތްތައް ބޭނުންކުރުން: މުހިންމު މެސެޖުތަކަށް ބާރުދިނުމަށް ޓަކައި އެއްގޮތަށް ވުރެ ގިނަ ގޮތްތައް ނުވަތަ ވަސީލަތްތައް (އަނގަބަހުންނާއި ލިޔުމުން) ބޭނުންކުރުން.
• ސަގާފީ ވިސްނުން: ސަގާފީ ހޭލުންތެރިކަން އިތުރުކޮށް، ތަފާތު ސަގާފަތްތަކާ އެކަށޭނަ ގޮތަށް މުއާމަލާތުކުރާ ގޮތް ބައްޓަންކުރުން.
• ފީޑްބެކް ނިޒާމުތައް: މެސެޖު ދޭހަވިކަން ކަށަވަރުކުރުމަށާއި އޮޅުންފިލުވުމަށް ފުރުސަތުތައް އުފެއްދުން.
• އީމޯޝަނަލް އިންޓެލިޖެންސް: މުއާމަލާތުކުރާއިރު އަމިއްލަ އިހުސާސްތަކާއި އަނެކުންގެ އިހުސާސްތައް ދެނެގަނެ، މެނޭޖުކުރުން.
• އެކަށީގެންވާ މާހައުލު: މާއްދީ ގޮތުން ސަމާލުކަން ކެނޑޭ ކަންކަން ކުޑަކޮށް، ހަރުދަނާ މުއާމަލާތަކަށް އެހީތެރިވެދޭ މާހައުލެއް ޚިޔާރުކުރުން.

3 ރައްދުދިނުމާއި ހަރުދަނާކަން

މުއާމަލާތުގައި ރައްދުދިނުމުގެ ދައުރު

ރައްދުދިނުމަކީ (ފީޑްބެކް) މެސެޖަކަށް ލިބޭ ރައްދު ނުވަތަ އަމަލެވެ. މިއީ މުއާމަލާތުގެ ދައުރު ފުރިހަމަކޮށް، އޭގެ ހަރުދަނާކަން ކަނޑައެޅޭ ކަމެކެވެ.

• ފީޑްބެކްގެ ބާވަތްތައް: އެދެވޭ/ނޭދެވޭ، ވަގުތުން/ލަސްވެގެން، އަނގަބަހުން/ބަހަކާ ނުލައި، ބައްޓަންކުރާ (Formative)/ ނިންމާ  (Summative)،އަދި އެތެރޭގެ/ބޭރުގެ ފީޑްބެކް.
• ފީޑްބެކްގެ ދައުރު: މެސެޖު ދޭހަވިކަން ކަށަވަރުކޮށްދިނުން، އޮޅުންތައް ރަނގަޅުކުރުން، ރަނގަޅު ކަންކަމަށް ބާރުދިނުން، ރަނގަޅު އަޚުލާގަށް ސަމާލުކަން ދިނުން، އަދި ގުޅުންތައް ބަދަހިކުރުން.
• އިންތިޒާމުކުރާ ވަސީލަތެއްގެ ގޮތުގައި ފީޑްބެކް: މެސެޖު ލިބޭ މީހާގެ ރައްދަށް ބަލައި، އެ ވަގުތުން އެ ވަގުތަށް މެސެޖު ބަދަލުކުރުމަށް މުއާމަލާތުކުރާ މީހާއަށް އެހީތެރިވެދިނުން.

ކާމިޔާބު ފީޑްބެކްގެ ސިފަތައް

ކޮންމެ ފީޑްބެކަކީ އެއްވަރަކަށް ބޭނުންތެރި އެއްޗެއް ނޫނެވެ. ކާމިޔާބު ފީޑްބެކް ތަބާވަނީ އޭގެ އަސަރު ބޮޑުކޮށްދޭ ޚާއްސަ އުސޫލުތަކަކަށެވެ.

• ޚާއްސަ އަދި ސިފަކޮށްދޭ: އާންމު ހިޔާލުތަކުގެ ބަދަލުގައި ޚާއްސަ އުޅުންތަކަށް ނުވަތަ މައުލޫމާތަށް އަމާޒުކުރުން.
• ވަގުތަށް ސަމާލުވުން: އަދާކުރެވުނު އަމަލާ ނުވަތަ ކުރެވުނު މުއާމަލާތާ އެންމެ ގާތް ވަގުތެއްގައި ދިނުން.
• ހަމަހަމަކަން: އެކަށީގެންވާ ހާލަތްތަކުގައި އެދެވޭ ބާރުދިނުމާއި އިސްލާހީ ފާޑުކިޔުން އެކުލެވުން.
• އަމަލީ ހައްލު: ހަމައެކަނި މައްސަލަތައް ދެއްކުމުގެ ބަދަލުގައި ރަނގަޅުކުރާނެ އަމަލީ ގޮތްތައް ހުށަހެޅުން.
• އިހުތިރާމްކުރުން: ލިބޭ މީހާގެ އަބުރާއި އަމިއްލަ ގަދަރަށް އުނިކަން ނުލިބޭ ގޮތަށް ފޯރުކޮށްދިނުން.
• އަމާޒަށް ބެހެއްޓުން ހިއްސާކުރެވޭ އަމާޒުތަކާއި ބޭނުންވާ ނަތީޖާތަކާ އެއްގޮތަށް ބެހެއްޓުން.

މުއާމަލާތުގެ ހަރުދަނާކަން މިނެކިރުން

މުއާމަލާތެއްގެ ހަރުދަނާކަން މިނެކިރެނީ ބޭނުންވި މާނަ ސައްހަކޮށް ހިއްސާކުރެވި އަދި ދޭހަވި މިންވަރެއްގެ މައްޗަށެވެ.

• ސައްހަކަން: މެސެޖު ފޮނުވި މީހާ ބޭނުންވި ގޮތަށް މެސެޖު ދޭހަވުން.
• ދޭހަވުން: މެސެޖު ލިބުނު މީހާއަށް މެސެޖުގެ މައުލޫމާތާއި އޭގެ މާހައުލު ފުރިހަމައަށް އެނގުން.
• އެކަށީގެންވުން: މެސެޖަކީ މާހައުލާއި، ގުޅުމާއި، ސަގާފީ ހަމަތަކާ އެކަށީގެންވާ މެސެޖަކަށްވުން.
• ކުޅަދާނަކަން (Efficiency) މަދު ވަސީލަތްތަކަކާއި މަދު ވަގުތުކޮޅެއްގެ ތެރޭގައި މެސެޖުގެ މަގުސަދު ހާސިލުވުން.
• ގުޅުން ބަދަހިވުން: މުއާމަލާތުގެ ސަބަބުން ދެފަރާތުގެ ގުޅުމަށް ގެއްލުންވުމުގެ ބަދަލުގައި ގުޅުން ބަދަހިވުން.
• އަމަލު/ރައްދު: މުއާމަލާތުގެ ސަބަބުން އެދެވޭ އަމަލެއް ނުވަތަ ނަތީޖާއެއް ނުކުތުން.

އަމިއްލަ މުއާމަލާތުކުރުމުގެ ހަރުދަނާކަން އިތުރުކުރުން

ވިސްނުންތެރިކަމާ އެކު އަމަލުކުރުމާއި ފިކުރުކުރުމުގެ ތެރެއިން މީހުންނަށް އެމީހުންގެ މުއާމަލާތުކުރުމުގެ ހުނަރުތައް ތަރުތީބުން ރަނގަޅުކުރެވިދާނެއެވެ.

• އަމިއްލައަށް ފާރަވެރިވުން (Self-Monitoring) އަމިއްލަ މުއާމަލާތުކުރުމުގެ އުސޫލުތަކަށާއި، އަނެކުންނަށް އެކަމަކުން ކުރާ އަސަރުތަކަށް ހޭލުންތެރިވުން.
• އަޑުއަހާ މީހުން ދިރާސާކުރުން: އަޑުއަހާ މީހުންގެ ޚާއްސަ ބޭނުންތަކަށާއި، މައުލޫމާތަށާއި، އުންމީދުތަކަށް މެސެޖު ބައްޓަންކުރުން.
• މެސެޖު އޮގަނައިޒްކުރުން: ސާފު ތައާރަފަކާއި، މައިގަނޑު ނުކާތަކާއި، ނިންމުމާ އެކު މައުލޫމާތު ތަރުތީބުކުރުން.
• ބަހަކާ ނުލައި ކުރެވޭ އިޝާރާތްތަކަށް ހޭލުންތެރިވުން: ހަށިގަނޑުގެ ހަރަކާތްތަކާއި، އަޑުގެ ރާގާއި، މޫނުމަތީގެ އިހުސާސްތައް ދައްކާ ވާހަކައާ އެއްގޮތްކުރުން.
• އަބަދުވެސް ރަނގަޅުކުރުން: މުއާމަލާތުގެ ހަރުދަނާކަމާ މެދު ފީޑްބެކް ހޯދައި، އެއަށް އަމަލުކުރުން.

4 މުހިންމު ނުކާތައް

އަސާސީ އުސޫލުތައް

• މުއާމަލާތުކުރުމުގެ މޮޑެލްތައްވަނީ އެއްކޮޅަށް ހިނގާ (ލީނިއަރ) މޮޑެލްތަކުން ދެކޮޅަށް ހިނގާ (އިންޓަރެކްޓިވް) މޮޑެލްތަކަށާއި، އެކުއެކީގައި ހިނގާ (ޓްރާންސެކްޝަނަލް) މޮޑެލްތަކަށް ބަދަލުވެފައެވެ.
• ހަރުދަނާ މުއާމަލާތަކަށް ޓަކައި މާއްދީ، ނަފްސާނީ، ބަހުގެ، އަދި ސަގާފީ ހުރަސްތަކުން އަރައިގަންނަންޖެހެއެވެ.
• ފީޑްބެކަކީ މުއާމަލާތުގެ ދައުރު ފުރިހަމަކޮށް، އެކަކު އަނެކަކަށް ފުރިހަމައަށް ދޭހަވިކަން ކަށަވަރުކުރުމަށް ކޮންމެހެން ބޭނުންތެރި ކަމެކެވެ.
• މުއާމަލާތުގެ ހަރުދަނާކަން މިނެކިރެނީ ސައްހަކަމާއި، ދޭހަވުމާއި، އެކަށީގެންވުމާއި، އަދި ހާސިލުވި ނަތީޖާއިންނެވެ.
• އެންމެ ކާމިޔާބު މުއާމަލާތްތެރިން ހާލަތަށާއި، މާހައުލަށާއި، އަޑުއަހާ މީހުންނަށާއި، ފީޑްބެކަށް ބަލައި އެ މީހުންގެ އުސޫލުތައް ބަދަލުކުރެއެވެ.

އަމަލީ އޮނިގަނޑު

• އެންމެ އެކަށީގެންވާ މޮޑެލްއާއި އުސޫލު ކަނޑައެޅުމަށްޓަކައި ތިމާ މުއާމަލާތުކުރާ މާހައުލު ދިރާސާކުރުން.
• މުއާމަލާތަށް ބުރޫއެރުމުގެ ކުރިން ދިމާވެދާނެ ހުރަސްތައް އިސްވެ ދެނެގަނެ، އެކަންކަމަށް ހައްލު ހޯދުން.
• ދޭހަވި މިންވަރު އިތުރުކުރުމަށްޓަކައި ޚާއްސަ، ވަގުތަށް ސަމާލު، އަދި އިސްލާހީ ފީޑްބެކް ހޯދުމާއި ދިނުން.
• އަމިއްލަ ގުޅުންތަކުގެ މުއާމަލާތްތަކުގައި އަސާސީ އޮނިގަނޑެއްގެ ގޮތުގައި ޓްރާންސެކްޝަނަލް މޮޑެލް ބޭނުންކުރުން.
• ތަމްރީނާއި، ފިކުރުކުރުމާއި، ފީޑްބެކްގެ ތެރެއިން މުއާމަލާތުކުރުމުގެ ހުނަރުތައް އަބަދުމެ ތަރައްގީކުރުން.